Hvílíkt og annað eins hörmungar HM sem þetta ætlar að verða! 3 lið eftir og hvert öðru leiðinlegra og asnalegra, full af olíubornum vælukjóum og pervertum. Það er fínt að þetta sé að verða búið - nú getur maður byrjað að einbeita sér af fullri hörku að Rock Star Supernova sem hefst í kvöld á miðnætti. Ég hef fulla trú á því að Magni standi sig eins og hetja. Og hver skyldi ástæðan fyrir ofurtrú minni á Magna vera? Hún er einföld: Magni er magnaður!

Kartan:

Þýskaland verður heimsmeistari. Ég nenni ekki að einhverjir aðrir vinni.

Þessi fáviti...

...er fáviti.

Svona vil ég hafa undanúrslitin:

Þýskaland - Úkraína
og
England - Brasilía

Líkurnar á að þetta verði að veruleika eru álíka miklar og að David Beckham breytist í karlmann.

VS



Ef froskalappirnar vinna Spánverja á eftir verð ég alveg kreisí. Kreisí, segi ég. Öll liðin sem ég held með eru að hrynja úr keppni eitt af öðru. Ætli maður endi ekki á því að styðja Þjóðverja til sigurs. Verra gæti það verið.

VS



Ég myndi gefa eitt ár af ævi minni fyrir Tékkasigur í dag gegn pizzustrákunum. Það er ólíklegt að það gerist, en ég lagðist á bæn áðan og hef trú á því að veðurguðinn Óskar hafi heyrt í mér og virði óskir mínar. Þetta mót verður bara ekki eins án Tékkanna. Tékkland - Tékkaðu á því!

David Beckham víkur um stund úr efsta sæti haturslistans mins, þar sem hann hefur einn og óstuddur ráðið ríkjum í ca. 10 ár. David má alveg hjálpa Englendingum aðeins á HM þar sem allt lítur út fyrir að mínir menn Tékkar detti út snemma með ræpu í brók. Þeir sem hirða efsta sætið á listanum af Beckham, a.m.k. næstu 3 vikurnar eða svo, eru skítbuxarnir hjá Ölgerðinni Egill Skallagrímsson sem ákváðu að breyta Mixinu. Ég hef alla tíð verið mikill Mix aðdáandi en nú er búið að breyta því og setja nýtt Mix á markaðinn með 50% minni sykri. Varla þarf að taka fram að þetta bragðast viðbjóðslega og má líkja þessu við muninn á Egils appelsínudjúsþykkni og sykurlausu Egils appelsínudjúsþykkni - annað afbragð, hitt ógeð. Ég skora á fólk að hætta að kaupa Mix. MIX ER NÚLL OG NIX!!!

Nostradamus var ekkert merkilegri en Himmi

Svíar unnu Paragvæ 1-0 í gærkvöldi með skallamarki nærbuxnafyrirsætunnar Freddie Ljungberg á síðustu mínútunum. Stuttu eftir hádegi í gær, tæplega 7 klst. áður en leikurinn hófst, sendi Himmi mér þessa mynd sem hann teiknaði sjálfur. Ég er nú þegar búinn að leggja inn beiðni hjá honum um að teikna mig vinna í lottóinu.

Ef ég heyri Vilhjálm Vilhjálmsson borgarstjóra einu sinni enn lýsa því yfir að hann sé ennþá bara þessi sami gamli Villi sem hann hefur alltaf verið þá er töluverð hætta á því að ég taki þennan sama gamla Villa og troði honum upp í rassgatið á sjálfum sér. Hann kynnist þá kannski sínum innri Villa, sem er jú líklega nýr og allt annar Villi.

Mig langar til að stofna nýtt knattspyrnufélag. Nafnið á liðinu verður "Sverrir". Hugsið ykkur bara hversu skemmtilegt það yrði ef Ármann og Sverrir myndu etja kappi einhvern daginn.

Sú ákvörðun að sýna afmælistónleikana hans Bubba í beinni sjónvarpsútsendingu hefur vakið úlfúð og deilur. Kóngurinn gefur lítið fyrir slíkt kvabb:

"hvað er að ykkur hvað er að því að sína tónleikana beint ég vildi það fyrir alla þá sem gátu ekki feingið miða hvaða ég fra mer til mín mórall er þetta og í guðanabænum komon peninga plott hvað seldu þá miðana þína og horfðu á þetta heima og græddu á því mer finst það frabært að þetta skuli vera í beinni kv Bubbin."

Láttu helvítin heyra það, Bóbó!

Hinn frábæri söngvari og lagasmiður og sanni frumkvöðull Desmond Dekker er látinn, 64 ára að aldri. Voðalegur fálki er maður að hafa ekki drifið sig að sjá þennan meistara á tónleikum áður en hann dó. Ég heiti hér með að gera allt sem í mínu valdi stendur til að sjá allar mínar helstu hetjur spila áður en þær geyspa golunni, það er bara spurning með forgangsröðina. Hugsa að það gæti verið ráðlegt að hafa Bob Dylan, Kenny Rogers og Holly Johnson framarlega á listanum.

Eins og glöggir lesendur Frívaktarinnar hafa tekið eftir má varla birtast sá spurningalisti á netinu að ég sé ekki mættur sveittur til að svara honum. Eftirfarandi listi er líklega með þeim lúðalegri sem sést hafa, en ég get ekki hamið mig:

1. Aldrei í lífi mínu: Aldrei að segja aldrei.
2. Þegar ég var fimm ára: Var Katla María eftirlætis tónlistarmaðurinn minn.
3. Menntaskólaárin voru: Ókei.
4. Ég hitti einu sinni: Val í Buttercup þegar ég var að horfa á Liverpool leik á Glaumbar. Brian Pilkington var líka þar. Ég veit ekki hvort þeir tveir komu saman.
5. Einu sinni þegar ég var á bar: Settist ég í ælu. Var mjög pirraður yfir því, jafnvel eftir að ég uppgötvaði að ælan var mín eigin.
6. Síðastliðna nótt: Sofnaði ég seint. Ég er þreyttur núna en náði samt að sjá L.A. Clippers vinna Phoenix Suns sem var stuð.
7. Næsta skipti sem ég fer í kirkju: Verður vonandi þegar einhver giftir sig, fermist eða skýrist. Ég hef ekkert á móti kirkjum.
8. Þegar ég sný hausnum til vinstri sé ég: Himma, samstarfsmann minn og Liverpúllara.
9. Þegar ég sný hausnum til hægri sé ég: Myndir af Robbie Fowler og Kobe Bryant.
10.Þegar ég verð gamall: Ætla ég að búa á stað þar sem ég get verið practically naked allt árið.
11. Um þetta leyti á næsta ári: Verður Liverpool u.þ.b. að vinna ensku deildina. Vonandi verð ég á staðnum.
12. Betra nafn fyrir mig væri: Boris.
13. Ég á erfitt með að skilja: Fífl.
14. Þú veist mér líkar vel við þig ef: Ég pota stundum óvænt í bumbuna á þér.
15. Fyrsta manneskjan sem eignaðist barn í mínum vinahóp er: Ölvir, svona af mínum nánustu held ég.
16. Farðu eftir ráðum mínum: Og hættu að kaupa þér stór sólgleraugu. Ég sé inn í tískuframtíðina og mjó sólgleraugu eru að fara meika stórt kombakk á næstu árum.
17. Uppáhalds morgunmaturinn minn er: Kókó Pöffs
18. Afhverju myndi ég hata þig?: Erfið spurning.
19. Ég myndi stoppa mitt eigið brúðkaup ef: Geir Ólafs ætti að syngja í því.
20. Heimurinn mætti alveg vera án: Coldplay og Manchester United.
21. Ég myndi frekar sleikja svínsrass en að: Sleikja Elton Johnsrass.
22. Bréfaklemmur eru nytsamlegri en: Reykelsi.
23. Ef ég geri e-ð vel, er það: Að teikna KR-merkið fríhendis.
24. Myndir sem ég felli tár yfir eru: Nokkuð margar. Í svipinn man ég t.d. eftir ET, Kolya og La Bamba.

Hrafnhildur Kjartansdóttir, 12 vikna.

Ég er að fara á Bubba! Það verður stuð stuðanna! Gefum Bubbla sjálfum orðið:

„hin almenni maður mætti snemma náði ser í stúkusæti
vip stúka verður fyrir bræður mína vini og styrktaraðila tónleikana það eru ekki nema kanski 100 miðar og mer finst það í góðu lagi það er ekkert samsæri í gangi kv Bubbin."

Gott að vita að það er allt á hreinu. Ekkert samsærisrugl í kringum hann Bubbó minn.

Stundum hugsa ég á ensku. Það gerist algerlega ómeðvitað, en þegar ég sé eða heyri um ákveðið fólk koma upp í hugann enskir frasar sem mér finnst lýsa persónunni afar vel. Dæmi:

Þegar ég sé eða heyri um rithöfundinn Andra Snæ Magnason kemur upp í hugann: "pompous ass."

Annað dæmi:

Þegar ég sé eða heyri um badmintonmeistarann Brodda Kristjánsson kemur upp í hugann: "great athlete."

Þegar ég hinsvegar sé eða heyri um leikarann Valdimar Örn Flygenring kemur aðeins eitt orð upp í hugann, og það á íslensku:

"Nammi!"

Ég var í London um daginn. Ég eyddi töluverðum tíma á Oxford Street og gekk margoft framhjá manni sem var með köngulóarvef húðflúraðan framan í sig og betlaði af mér peninga. Mér sýndist betlið ekki ganga sem skyldi hjá honum, a.m.k. gaf ég honum ekki krónu með gati.

- Ég komst ekki hjá því að velta því fyrir mér hvort honum hefði kannski gengið betur að betla ef hann hefði sleppt því að láta tattúvera köngulóarvef framan í sig.

Lífið er ljúft

Aldrei fyrr hefur mér þótt meira viðeigandi að vitna í meistarann, enda varla annað hægt þegar maður hefur eignast litla englastelpu. Sólargeislinn okkar kom í heiminn kl. 09:08 á þriðjudagsmorgunn, vó 13,5 merkur og mældist 50.5 cm. Yndisleg alveg hreint. Öllum heilsast vel.

Pabbi

Hádí.

hljómleikamiði á dag kemur skapinu í lag. Ray Davies í gær í boði Láru og Goldie Lookin´ Chain í dag í boði Kalla. En segið mér eitt, kæru lesendur:

Er Einar Bárðarson þroskaheftur???

Einar rukkar 13.900 + 500 kr. miðagjald = 14.400 krónur fyrir dýrustu miðana á Ray Davies! Ókei - Ray er mikill snillingur og ég er mikill aðdáandi hans og allt það, en hann er samt 96 ára gamall fyrrverandi rokkogróler sem er með nýja hljómsveit með sér - það er ekki eins og þetta séu Kinks! Og þó að þetta væru Kinks væri þetta samt bjánalega dýrt! Ódýrustu miðarnir (eins og ég á) kostuðu 7.400 kall! Ég finn rottulykt, dömur mínar og herrar. Þetta er hættuleg þróun. Þessar verðpælingar hans Einars mega bara vera einar mín vegna.